بلخ کې د ۱۳۰ زره امریکایي ډالرو په ارزښت د افغاني سرې میاشتې مرستون ګټې اخیستنې ته وسپارل شو
چهارشنبه، ۱۴ شوال ۱۴۴۷
بلخ ولایت کې د افغاني سرې میاشتې د مرستون ودانۍ، چې د ۱۳۰ زره امریکایي ډالرو په ارزښت بیا رغول شوې وه، نن په رسمي مراسمو کې ګټې اخیستنې ته وسپارل شو.
په مراسمو کې د افغاني سرې میاشتې د مرستونونو رئیس شیخ الحدیث سید احمد بهره مند، د شمال زون رئیس ملا محمد حنیف خالد، د ملي ټولنو نړیوال فدراسیون استازو او یو شمېر کارکوونکو ګډون کړی و.
د مرستونونو رئیس وویل: دا مرکز به د بې سرپرسته مېرمنو او ماشومانو د ملاتړ او د رواني ناروغانو د درملنې او پالنې په برخه کې مهم رول ولوبوي او هڅه به وشي چې مشمولینو ته پکې لازمې اسانتیاوې برابرې شي.
نوموړي د ملي ټولنو د نړیوال فدراسیون له همکاریو هم مننه وکړه، چې د مرستون له مشمولینو سره یې د حرفوي زده کړو په برخه کې مرسته کړې ده.
د شمال زون رئیس وویل، د دې ودانۍ د بیارغونې ټول لګښت ۱۳۰ زره امریکایي ډالره دی. نوموړي زیاته کړه، چې دا مرستون به د بې سرپرسته مېرمنو، ماشومانو او رواني ناروغانو لپاره یو خوندي او معیاري چاپېریال برابر کړي.
دغه مرستون په داسې حال کې ګټې اخیستنې ته سپارل کېږي، چې په سیمه کې ګڼې اړمنې کورنۍ ورته خدمتونو ته اړتیا لري.
