فراه؛ د نږدې ۱۹.۳ میلیونه افغانیو په لګښت د افغاني سرې میاشتې نوې ودانۍ پرانیستل شوه
شنبه، ۱۰ شوال ۱۴۴۷
فراه ولایت کې د افغاني سرې میاشتې نمایندګۍ د ریاست نوې اداري ودانۍ د یو لړ مراسمو په ترڅ کې رسماً پرانیستل شوه.
په یادو مراسمو کې د افغاني سرې میاشتې عمومي رئیس ښاغلي شیخ الحدیث شهاب الدین دلاور، د فراه ولایت والي ښاغلي ملا محمد حافظ مجاهد، د لویدیځ زون او د اړونده نمایندګیو رئیسانو او یو شمېر نورو ولایتي چارواکو ګډون درلود.
ښاغلي دلاور په خپلو خبرو کې وویل: یاده ودانۍ د بیت المال شتمني ده او د هغې ساتنه او سم کارول جدي پاملرنې ته اړتیا لري. نوموړي زیاته کړه، چې د دې ودانۍ جوړولو موخه یوازې اداري اړتیاوو پوره کول نه دي، بلکې د زیانمنو خلکو لپاره به د خدماتو د کیفیت لوړولو او د بشري مرستو په چټک او اغېزمن رسولو کې مهم رول ولوبوي.
ورپسې د فراه والي هم د افغاني سرې میاشتې له مشرتابه مننه وکړه او ټینګار یې وکړ، چې د دې ولایت خلکو ته دې لا زیاته پاملرنه وشي او د مرستو کچه دې پراخه شي.
د یادونې وړ ده، چې یاده څلور پوړیزه ودانۍ د ۱۰ میاشتو په موده کې بشپړه شوې ده او ټولیز لګښت پرې ۱۹،۲۶۶،۰۸۹ میلیونه افغانۍ راغلی دی.
د دې ودانۍ د پرانیستې موخه دا ده، چې هېوادوالو ته بشري خدمتونه په منظم او مؤثر ډول وړاندې شي او مرستې په سمه توګه ورته ورسول شي.
