افغاني سرې مياشتې په کونړ کې پر ۴،۱۰۰ بېځایه شوو کورنیو ۶۱.۵ میلیونه افغانۍ ووېشلې
سې شنبه، ۲۸ رمضان ۱۴۴۷
افغاني سرې میاشتې د کونړ ولایت په ناړۍ او سرکاڼو ولسوالیو کې پر ۴،۱۰۰ داخلي بېځایه شوو کورنیو ۶۱ میلیونه او ۵۰۰ زره افغانۍ نغدي مرسته ووېشله، چې له مخې یې هرې کورنۍ ته د لومړنیو اړتیاوو د پوره کولو په موخه ۱۵ زره افغانۍ ورکړل شوې.
د مرستې د وېش په مراسمو کې د افغاني سرې میاشتې ټولنې د مقام سلاکارانو ښاغلي شیخ الحدیث احمد نور حنیف، مولوي محمد عثمان بلوچ، د ختیځ زون رئیس مولوي قمر ګل نصرت او د کونړ نماینده ګۍ رئیس مولوي عبداللطیف ثابت ګډون درلود.
د مرستې پر مهال ښاغلي شیخ الحدیث احمد نور حنیف وویل: د پېښو له امله د بېځایه شوو هېوادوالو ملاتړ او لاسنیوی د افغاني سرې میاشتې له اساسي مسؤلیتونو څخه دی او زیاته یې کړه، چې افغاني سره میاشت به د خپلو بشري فعالیتونو په چوکاټ کې، د کورنیو او بهرنیو مرستندویه بنسټونو په همکارۍ له زیانمنو کورنیو سره مرستو ته دوام ورکړي.
نوموړي دغه بشري مرسته د بېځایه شوو کورنیو لپاره په دې ستونزمن حالت کې د ژوند د لومړنیو اړتیاوو د پوره کولو مهمه وسیله وبلله او ډاډ یې څرګند کړ، چې په راتلونکي کې به يو شمېر نورو ولايتونو کې هم ورته مرستې ترسره شي.
همدا راز، د ختیځ زون رئیس قمر ګل نصرت وویل چې د مستحقو کورنیو د تثبیت لپاره لومړی شفافه سروې ترسره شوې او اوس د ټاکل شوي مېکانېزم له مخې نغدي مرسته وېشل کېږي. د هغه په خبره، هڅه شوې چې مرسته رښتینو اړمنو کسانو ته ورسېږي.
