له خوارځواکۍ تر عاید؛ پکتیکا کې ۳۰۰ اړمنې مېرمنې له نغدي مرستې برخمنې شوې

دوشنبه، ۲۴ جمادی الآخره ۱۴۴۷
افغاني سرې میاشتې د پکتیکا ولایت په ګومل ولسوالۍ کې د خوارځواکۍ له امله اغېزمنو شوو ۳۰۰ مېرمنو سره د خوړو د پیاوړتیا او کوچنیو کاروبارونو د برابرولو په موخه په پنځم او وروستي پړاو کې لس میلیونه او پنځه سوه زره (۱۰،۵۰۰،۰۰۰) افغانۍ نغدي مرسته ترسره کړه، چې هرې مېرمنې ته ۳۵ زره افغانۍ ورکړل شوې.
په ياده مرسته کې ۱۰ زره افغانۍ د نغدي مرستو وروستی پړاو او ۲۵ زره افغانۍ د وړو کاروبارونو د پيل لپاره وې.
د یادونې وړ ده، چې پر یادو مېرمنو په پنځو پړاوونو کې په ټوله کې ۲۲.۵ میلیونه افغانۍ ووېشل شوې، چې هرې مېرمنې ۷۵ زره افغانۍ ترلاسه کړې.
ورته مهال، د خوارځواکۍ په اړه د عامه پوهاوي برخه کې ۷ تنو فعالو رضاکارانو ته هم د پنځو میاشتو خدمت په بدل کې په ټولیز ډول ۵۹۶،۰۰۰ افغانۍ ورکړل شوې.