ختيځ زون زلزله؛ اسلامي همکاريو سازمان ۱۰۰ زره امریکایي ډالر نغدي مرسته افغاني سرې میاشتې ته وسپارله
سې شنبه، ۲۰ جمادی الأولی ۱۴۴۷
د اسلامي همکاریو وجهي صندوق له لوري د کونړ زلزله ځپلو وګړو د لاسنیوي په موخه ۱۰۰ زره امریکایي ډالرو نغدي مرسته په افغانستان کې د اسلامي همکاریو سازمان د مشر ښاغلي دکتور محمد سعید العیاش او د یاد سازمان د ځانګړي استازي ښاغلي ډاکټر طارق علي بخیت په لاس د افغاني سرې میاشتې عمومي رئیس ښاغلي شیخ الحدیث شهاب الدین دلاور ته وسپارل شوه.
د یاد مبلغ نغدي مرستې د سپارلو پر مهال عمومي رئیس د ختیځو ولایتونو زلزله ځپلو کورنیو د لاسنیوي او ملاتړ برخه کې د اسلامي همکارۍ د وجهي صندوق د نغدي مرستې مننه وکړه او ډاډ یې ورکړ، چې مرستې به یې په بشپړ شفافیت تر زلزله ځپلو کورنیو وروسول شي. دغه راز ښاغلي دلاور له افغاني سرې میاشتې سره د سوري زړه ناروغانو د درملنې او طبيعي پېښو زیانمنو سره د اسلامي همکاريو سازمان د همکاریو ستاینه وکړه او د مرستو د دوام هیله یې وکړه.
ورپسې د اسلامي همکاریو سازمان مشر د زیانمنو او اړمنو وګړو لاسنیوی د ټولو مسلمانانو اسلامي وجیبه وګڼله او هم یې د اړمنو افغانانو د لاسنیوي او بشري مرستو د دوام ژمنه وکړه.
