د ملي ټولنو نړیوال فدراسیون سرپرست د افغاني سرې میاشتې له مشرتابه سره د مخه ښې لیدنه وکړه
سې شنبه، ۲۱ ربیعالآخر ۱۴۴۷
د ملي ټولنو نړیوال فدراسیون سرپرست ښاغلي جُی سینګال په افغانستان کې د خپلې کاري مودې د پای ته رسېدو وروسته د خپلې مرستیالې آغلې هُما نادر په ملتیا د افغاني سرې میاشتې له عمومي رئیس شیخ الحدیث شهاب الدین دلاور او د نوموړي له مرستیال ښاغلي حافظ عزیز الرحمن سره تودیعي لیدنه وکړه.
عمومي رئیس له افغاني سرې میاشتې سره د بشري خدمتونو برخه کې د ښاغلي جُی سینګال له هڅو او په ځانګړي ډول د کونړ د وروستۍ زلزلې پر مهال د زیانمنو شوو وګړو د لاسنیوي او هغوی ته د مرستو راجلبولو برخه کې د نوموړي د هڅو ستاینه وکړه او اینده کې یې ورته د لا ډېرو بریالیتوبونوهیله څرګنده کړه.
ښاغلي جُی سینګال د افغاني سرې میاشتې له مشرتابه او کاري ټیم سره په ګډ کار خوښي وښوده او زیاته یې کړه، چې افغاني سره میاشت یوازينۍ ملي ټولنه ده، چې د هېوادوالو لاسنیوی کوي او زیانمنو ته پر وخت مرستې رسوي. نوموړي وویل: زه د افغاني سرې میاشتې له رهبرۍ او کارکوونکو مننه کوم چې د ګډ ماموریت پر مهال یې له موږ سره بې سارې همکاري وکړه. ستاسو ژمنتیا، انساني احساس او د زیانمنو د لاسنیوي او ملاتړ برخه کې نه ستړې کېدونکې هڅې به تل زما په یاد وي.
