کونړ کې له ۲۵۰ زلزله ځپلو کورنیو سره د غیر خوراکي توکو مرسته وشوه

پنجشنبه، ۹ ربیع الآخر ۱۴۴۷
د افغاني سرې میاشتې له لوري د کونړ ولایت د نورګل ولسوالۍ په مزار دره کې د وروستۍ زلزلې له امله له ۲۵۰ زیانمنو شوو کورنیو سره ۹ قلمه د غیر خوراکي توکو مرسته وشوه.
یاده مرسته چې د ملک سلمان د بشري مرستو مرکز له لوري چمتو شوې وه، هرې کورنۍ ته یوه خېمه، پنځه کمپلې، یو د پخلنځي توکو سیټ، یو پلاستیکي فرش، یو د اوبو ترموز، یوه جارو، یو صابون، یو څراغ او دوه د اوبو بوشکې ورکړل شوې.
دمرستې د وېشلو پر مهال، د افغاني سرې میاشتې د ختیځ زون رئیس ښاغلي مولوي قمرګل نصرت، د کونړ نمایندګۍ رئیس ښاغلي مولوي عبداللطیف ثابت او د ملک سلمان د بشري مرستو مرکز استازو ګډون درلود.
د یادې مرستې موخه، د هغو کورنیو د بېړنیو اړتیاوو پوره کول دي، چې د وروستۍ زلزلې له امله له ګڼو ستونزو سره مخ دي.