د کډوالو لاسنیوی؛ افغاني سره میاشت او د ډنمارک سور صلیب خپلمنځي همکارۍ پراخوي
یکشنبه، ۲۴محرم الحرام ۱۴۴۷
د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن د افغانستان لپاره د ډنمارک سره صلیب له مشر ښاغلي محمد الشماع او مل پلاوي سره د راستنېدونکو کډوالو د لاسنیوي او ملاتړ په موخه وکتل.
کتنه کې سرپرست عمومي رئیس راستنو شوو کډوالو ته د روغتیا، خوراک، څښاک او لنډ مهاله استوګنې په برخو کې د افغاني سرې میاشتې له لوري د ترسره شوو بشرپالو خدمتونو او راتلونکو اقداماتو په اړه خبرې وکړې او زیاته یې کړه چې په افغانستان کې د وچکالۍ، کډوالۍ او بې کارۍ له امله د اړمنو وګړو ستونزې ډېرې شوي، خو د اړتیاوو په پرتله شته منابع محدودې دي او د دې ستونزې د حل لپاره باید بشري مرستې لا پراخې شي.
په افغانستان کې د ډنمارک د سره صلیب مشر د افغاني سرې میاشتې د بشري خدمتونو ستاینه وکړه او ژمنه یې وکړه چې د راستنېدونکو کډوالو د لاسنیوي ترڅنګ به له بې وزلو او اړمنو کورنیو سره د مرستو برخه کې خپل ملاتړ ته دوام ورکړي.
