د افغاني سرې مياشتې يو پلاوي ترکيې ته سفر وکړ

د افغاني سرې مياشتې يو پلاوي ترکيې ته سفر وکړ

د افغاني سرې مياشتې يو پلاوي په عملياتي چارو کې د سيکرتر جنرال مرستيال ښاغلي مولوي عبد اللطيف ثابت په مشرۍ د ترکيې استانبول ښار ته د SHAPE  (ټولنيزې روغتيا، عامه پوهاوي، بېړنيو بشري مرستو او اقتصادي پياوړتيا له لارې د زيانمنو او اړمنو وګړو ملاتړ) برنامې د ارزونې په موخه سفر وکړ.  
ياد سفر د FCDO (د برېتانيې د بهرنیو شریکو ګټو او پراختيايي چارو ادارې) په بلنه ترسره شوى؛ څو د يادې برنامې روان وضعيت، لاسته راوړنې او ننګونې و ارزوي، او د راتلونکو کلونو لپاره د يو اغېزمن پلان د طرحې پر جوړولو بحث ترسره او په تړاو يې لازمې پرېکړې وکړي.

افغاني سره مياشت د SHAPE  برنامې له لارې اړمنو کورنیو ته خوراکي توکي، خېمې، کمپلې او روغتيايي تجهیزات رسوي، هغو کسانو ته چې مسلکي او تخنيکي مهارتونه لري، د عايداتي سرچينو د برابرولو په موخه نقدي مرستې وېشي، د ټولنيزې ښکېلتيا، عامه پوهاوي او په ځوانانو کې د رهبرۍ ظرفيتونو د پياوړتيا برخه کې هم مهم نقش لوبوي.

افغاني سره مياشت ژمنه ده؛ څو له دې او ورته نورو برنامو له لارې د هېوادوالو د ژوند د ښه والي لپاره ګټنه وکړي.