هرات؛ ۸۹ راستنو شویو مېرمنو ته د ۲.۸ میلیونه افغانیو په ارزښت د کوچنیو کاروبارونو اړوند وسایل ووېشل شول
سې شنبه، ۸ جمادی الأولى ۱۴۴۸
د افغاني سرې میاشتې له لوري د هرات ښار د بېلابېلو ناحیو او د انجیل او ګذره ولسوالیو ۸۹ راستنو شویو مېرمنو ته د ځان بسیاینې په موخه د ۲.۸ میلیونه افغانیو په ارزښت د کوچنیو کاروبارونو اړوند وسایل ووېشل شول.
یاد وسایل د اتریش او ډنمارک سرو صلیبونو په ملاتړ چمتو شوي وو، چې پکې د خیاطۍ، وړۍ او غالۍ اوبدلو، شیریني پخولو، مهره دوزۍ، ګلدوزۍ، خامک دوزۍ، لبنیاتو پروسس او یو شمېر نورو حرفو اړوند وسایل شامل وو.
ددې پروګرام له مخې، هرې مېرمنې ته د ۳۲ زره افغانیو په ارزښت توکي او وسایل پېرل شوي دي.
تمه ده، چې دغه مرسته به د یادو مېرمنو لپاره د عاید دوامداره سرچینې برابرې او د خپلو کورنیو د اقتصادي ځان بسیاینې په برخه کې ورسره همکاري وکړي.
افغاني سره میاشت د راستنو شویو کورنیو او اړمنو مېرمنو د اقتصادي پیاوړتیا او د دوامدار عاید د برابرولو په موخه د کوچنیو کاروبارونو د ملاتړ پروګرامونو ته دوام ورکوي.
