هرات کې ۶۰ راستنو شویو کورنیو ته د ځان بسیاینې په موخه د ۲.۱ میلیون افغانیو مرستې ووېشل شوې
سې شنبه، ۱۹ شوال ۱۴۴۷
د افغاني سرې میاشتې له لوري د هرات ولایت د مرکز ترڅنګ په ګذره او انجیل ولسوالیو کې ۶۰ راستنو شویو کډوالو کورنیو ته د ۲.۱ میلیون افغانیو په ارزښت د ځان بسیاینې په موخه توکي ووېشل شول.
په مرسته کې هرې کورنۍ ته د کوچنیو کاروبارونو د پيل لپاره اړین توکي، لکه خیاطي، ګلدوزي، لاسي صنایع، قصابي او د موبایلونو د ترمیم وسایل، د ۳۵ زره افغانیو په ارزښت ورکړل شول.
تمه ده د دې مرستو له لارې یادې کورنۍ د عاید دوامدارې سرچینې ترلاسه کړي او پر نورو یې تکیه راکمه شي.
افغاني سره میاشت د راستنو شویو هېوادوالو د ځان بسیاینې او د هغوی د اقتصادي وضعیت د ښه والي لپاره خپلو هڅو ته دوام ورکوي.
