د افغاني سرې میاشتې له مشعل بیات ښوونځي څخه ۵۹ تنه زده کوونکي فارغ شول

سې شنبه، ۲۵ جمادى الآخره ۱۴۴۷
د افغاني سرې میاشتې اړوند د مشعل بیات ښوونځي له دولسم ټولګي څخه د ۵۹ تنو زده کوونکو فراغت غونډه د  کارکوونکو چارو ریاست د ګومارنې آمر ښاغلي احمد فیصل بریالي، د یاد ښوونځي د آمر ښآغلي ښایسته زمان حقیار، استاذانو، اداري کارکوونکو او فارغو زده کوونکو د والدینو په ګډون ترسره شوه.
غونډه کې د ښوونځي آمر ښاغلي ښایسته زمان حقیار د علم او پوهې په ارزښت خبرې وکړې او تعلیم یې د ټولنې د پرمختګ بنسټ وباله. هغه وويل: ځوانان د هېواد راتلونکی جوړوي او باید له شته فرصتونو څخه په ګټه اخيستنې، ځانونه په علم او نبوي اخلاقو سمبال کړي.
 نوموړي د مشعل بیات ښوونځي د استا‍ذانو هڅې وستایلې او د هغوی صادقانه زحمتونه یې د زده‌ کوونکو د بریا مهم لامل وباله. 
ښاغلي حقيار له فارغو زده‌ کوونکو وغوښتل، چې خپلو زده کړو ته دوام ورکړي، لوړې زده کړې تر سره کړي او د دین او هېواد د خدمت لپاره ځانونه چمتو کړي.
ورپسې، د افغاني سرې میاشتې د کارکوونکو چارو ریاست د ګومارنې آمر په خپلو خبرو کې وویل: تعلیم یوازې سند تر لاسه کول نه دي، بلکې د مسؤولیت منلو او عملي ژمنتيا پیل هم دی.
نوموړي ټینګار وکړ، چې نننی نسل باید د علم، مسلکي مهارتونو او سالمو انساني ارزښتونو پر بنسټ خپل راتلونکی جوړ کړي، د بشري خدمت، همکارۍ او رښتینولۍ روحیه پیاوړې کړي او د ټولنې د سوکالۍ لپاره اغېزمن رول ولوبوي.
د ښاغلي بريالي په وينا، دوامداره پرمختګ هغه مهال شونی دی، چې ځوانان له زده‌کړې سره یوځای د خدمت احساس هم پیاوړی کړي او د انساني کرامت د ساتنې په لاره کې عملي ګامونه واخلي.
د فراغت دا غونډه فارغو زده‌ کوونکو ته د ستاینلیکونو او ډالیو په وېش سره پای ته ورسېده.