ننګرهار؛ د ترکيې سرې مياشتې د کونړ زلزله ځپلو لپاره د څه باندې ۲۴ ټنه مرستو جوپه افغاني سرې مياشتې ته وسپارله
پنجشنبه، ۱۱ ربیع الأول ۱۴۴۷
د ترکيې سرې مياشتې له لوري د کونړ ولايت زلزله ځپلو سره د ۲۴.۳۲۵ ټنه خوراکي او غير خوراکي توکو جوپه، د جلال آباد په هوايي ډګر کې د افغاني سرې مياشتې د ختيځ زون رئيس مولوي قمرګل نصرت او د کونړ نمايندګۍ رئيس مولوي عبدالطيف ثابت ته وسپارل شوه.
د سپارلو په مراسمو کې، په افغانستان کې د ترکيې سفير مرستيال ښاغلی بلال ايمري بيرال، د ننګرهار ولايت مرستيال والي مولوي عزيز الله مصطفی، په افغانستان کې د ترکيې سرې مياشتې استازی ښاغلي نعيم الله کريمي او د ترکيې افاد مرستندویه بنسټ استازی ښاغلي سيف الدين کارابولوت هم حاضر وو.
مولوي نصرت د مرستو د ترلاسه کولو پر مهال د ترکيې له سرې مياشتې او افاد بنسټ مننه او د دې بشردوستانه اقدام قدرداني وکړه. نوموړي وویل: دا مرسته به د زلزله ځپلو د بېړنيو اړتياوو پوره کولو تر څنګ د هغوی د بحراني حالت کمښت او د ستونزو د هوارېدا لامل شي. نوموړي له نړیوالو خيريه بنسټونو هم وغوښتل، چې په دې سختو حالاتو کې له افغان ولس خپلې بشري مرستې و نه سپموي.
په ياده مرسته کې ۱۵۰ خېمې، ۱۰۵۰ کمپلې، ۲۵۰ د حفظ الصحې کڅوړې او ۳.۲۵ ټنه خوراکي توکي شامل دي، چې ډېر ژر به کونړ کې پر زلزله ځپلو هېوادوالو ووېشل شي.
