د افغاني سرې میاشتې سرپرست عمومي رئیس جینوا ته د خپل سفر په لړ کې د ملګرو ملتونو دفتر او د سویس هېواد د دایمي هیئت له مشر سره ګډه ناسته ترسره کړه!
د افغاني سرې میاشتې سرپرست عمومي رئیس ښاغلي مولوي مطیع الحق خالص جینوا ته د خپل سفر په لړ کې د ملګرو ملتونو دفتر او نورو نړیوالو سازمانونو ته د سویس هېواد د دایمي هیئت له مشر جرګ لاوبر سره ګډه ناسته ترسره کړه. ناسته کې په افغانستان کې د سویس د هېواد پر بشري مرستو او په روان کال کې د ملي ټولنو په نړیوال کنفرانس کې د افغاني سرې میاشتې پر فعاله ونډه خبرې وشوې. ناسته کې ښاغلي جرګ لاوبر ژمنه وکړه، چې افغانستان کې له اړمنو سره به د سویس هېواد د بشري مرستو د دوام او زیاتوالي په برخو کې هڅې وکړي.
