۱۰۷ سوالګرو کورنیو سره د بانکي حسابونو له لارې څه کم پنځه سوه زره افغانۍ نغدي مرسته وشوه

سې شنبه، ۲۶ محرم الحرام ۱۴۴٧
 د افغاني سرې میاشتې له لوري د میدان وردګ او کاپيسا ولایتونو له ۱۰۷ سوالګرو (بېرونيو مشمولینو) کورنيو سره د عزیزي بانک له لارې د څلور سوه او اته اتیا زره (۴۸۸،۰۰۰) افغانیو نغدي مرسته وشوه.
دا کورنۍ چې د يادو ولايتونو په مرکزونو او ولسواليو کې مستحقې پېژندل شوې وې، تر تثبیت وروسته ورته د بانکي حسابونو له لارې د سرطان میاشتې نغدي مرسته حواله شوه.
په لېږل شوې مرسته کې ګڼ نفوس لرونکو کورنیو ته د کورنۍ په سر ۵۰۰۰،  منځني نفوس لرونکو کورنيو ته ۴۰۰۰ او کم نفوس لرونکو ته ۲۰۰۰ افغانۍ ورکړل شوې.
د یادونې وړ ده، چې تېره ورځ هم په ننګرهار، غزني، پکتیکا او خوست ولایتونو کې ۴۹۹ سوالګرو کورنیو ته څه د پاسه دوه میلیونه افغانۍ د بانکي حسابونو له لارې حواله شوې وې.