کابل؛ مرکزي روغتون کې د سترګو د پردو جراحي عملیاتو پنځه ورځنی وړيا بهير پيل شو
یکشنبه، ۳۰ صَفَر ۱۴۴۷
د افغاني سرې میاشتې په همغږۍ او د ملک سلمان خیریه مرکز په مالي ملاتړ، د البصر نړیوال خیریه بنسټ له خوا د سترګو د پردو په رنځ اخته ناروغانو د درملنې او جراحي عملياتونو پنځه ورځنی بهیر، مرکزي روغتون کې پیل شو.
د پروګرام د پرانیستې پر مهال د افغاني سرې میاشتې عمومي رئیس شیخ الحديث شهاب الدین دلاور وویل، دا ډول پروګرامونه د بېوزلو او اړمنو هېوادوالو د درملنې برخه کې ارزښتمن او اغېزمن ګام دی او زیاته یې کړه، چې د دې بهیر له لارې به کابل کې ۴۰۰ تنو ناروغانو ته د کتنې، درملنې او جراحي عملیاتو ترڅنګ د سترګو د کمزورۍ لپاره عینکې هم ورکړل شي او په نږدې ورځو کې به ۴۰۰ تنو ناروغانو ته په ننګرهار او ۴۰۰ تنو نورو ته په کندهار کې هم د سترګو د پردو عملیاتونه ترسره شي.
همدا راز، نوموړي په نږدې راتلونکي کې د زړه سوري ناروغانو د درملنې او عملیاتو لپاره په طبي وسايلو سمبال روغتون د جوړیدو ډاډ وړاندې کړ او د هېواد په کچه یې د سرې میاشتې د روغتیایي خدمتونو د پراختیا ژمنه وکړه.
ورپسې د البصر نړيوال خیریه بنسټ استازي رضوان احمد بلوچ وویل، له ۲۰۲۳ کال راهیسې یې د افغاني سرې میاشتې په همکارۍ او د ملک سلمان خیریه بنسټ په مالي ملاتړ په افغانستان کې د سترګو ناروغانو د درملنې لړۍ پیل کړې او هڅه کوي چې دغه خدمات لا پراخ کړي.
