لوګر؛ سېلاب ځپلو کورنیو سره د خوراکي، غیر خوراکي توکو او نغدي مرسته وشوه
سې شنبه، ۵ محرم الحرام ۱۴۴۷
لوګر کې د وروستیو سېلابونو له امله د زیانمنو شویو کورنیو له ډلې د مرکز او محمد اغې ولسوالۍ اړوند ۹۴ سېلاب ځپلو کورنیو سره د لومړنیو اړتیاوو د پوره کولو په موخه د ښاغلي شیخ الحدیث شهاب الدین دلاور په لاس د خوراکي، غیر خوراکي توکو او نغدو پيسو مرسته وشوه.
د مرستې د وېش پر مهال د افغاني سرې میاشتې سرپرست عمومي رئیس په خپلو څرګندونو کې زیانمنو کورنیو ته د خواخوږۍ، صبر او غمشریکۍ مراتب وړاندې کړل او ډاډ یې ورکړ، چې افغاني سره میاشت تل د زیانمنو او اړمنو هېوادوالو تر څنګ ولاړه ده او په ټول توان هڅه کوو؛ څو په وخت د پېښځپلو لاسنیوی او ستونزو ته رسېدنه وکړو.
د یادونې وړ ده چې په وېشل شوې مرسته کې هرې کورنۍ ته د ۹ قلمه خوراکي، ۱۳ قلمه غیر خوراکي او ۱۳ قلمه روغتیایي توکو سربېره یوه اندازه نغدې پيسې هم ورکړل شوې.
