له المان څخه ۹ تنه په اور سوځيدلي او میکروبي هډوکو لرونکي ماشومان له درملنې او رغېدو وروسته هېواد ته راستانه شول

دوشنبه، ۱ ربیع الأول ۱۴۴۷
د افغاني سرې میاشتې له لوري المان هېواد ته په اور سخت سوځيدلي او د میکروبي هډوکو لرونکي ۹ تنه استول شوي ماشومان تر بشپړې درملنې او رغېدو وروسته بېرته هېواد ته راستانه او خپلو کورنیو ته وسپارل شول.
کورنیو ته د یادو ماشومانو د سپارلو پر مهال په عملیاتي چارو کې د افغاني سرې میاشتې د سکرتر جنرال مرستیال ښاغلي مولوي روح الله عبدالسلام د رالېږدول شوو ماشومانو پر درملنه خوښي وښوده، د المان د سولې کلي خیریه بنسټ هڅې یې وستایلې او د پاتې ناروغو ماشومانو د ژر رغېدو هیله یې وکړه.
نوموړي زیاته کړه: " افغاني سره میاشت له تېرو ۳۶ کلونو راهیسې د المان د سولې کلي خیریه بنسټ سره د لاسلیک کړي هوکړه لیک پر بنسټ هر کال دوه ځل په اور سخت سوځېدلي او د میکروبي هډوکو په رنځ اخته ماشومان یاد هېواد ته د درملنې په پار استوي او له نېکه مرغه تر دې مهاله په ۹۱ جوپو کې شاوخوا ۵۰۰۰ ماشومان له بریالۍ درملنې وروسته خپلو کورنیو ته راګرځېدلي او دا لړۍ لا هم جریان لري."
د یادونې وړ ده، چې د المان د سولې کلي خیریه بنسټ ډاکټران به د سنبلې میاشتې له (۴مې تر ۹مې) مرکزي دفتر کې يو شمېر نور هغه ماشومان، چې په یادو ناروغیو اخته وي او په کور دننه یې درملنه ناشونې وي، تر معاینې او انتخاب وروسته د درملنې په موخه المان هېواد ته ولېږدوي.