شيخ الحديث شهاب الدين دلاور: اسلام د بشري کرامت، عزت او همدردۍ برخه کې ځانګړي بنسټيز اصول لري
پنجشنبه، ۲۵ ربیع الأول ۱۴۴۷
مرکزي دفتر کې د یو شمېر امارتي ادارو کارکوونکو او د مساجدو امامانو ته د اسلام او نړیوالو بشرپالو قوانينو تر عنوان لاندې یو ورځنی ورکشاپ ترسره شو. ياد ورکشاپ کې د افغاني سرې میاشتې عمومي رئیس ښاغلي شیخ الحدیث شهاب الدین دلاور او د آزموینو ملي ادارې رئیس ښاغلي شیخ عبدالباقي حقاني هم ګډون کړى و.
پرانیسته کې د افغاني سرې میاشتې عمومي رئیس د اسلام له نظره د بشري حقونو، انساني کرامت، ټولنیز عدالت او حقونو د تأمین اړوند مفاهیم تشریح کړل او زیاته یې کړه چې د اسلام مبارک دین د بشري کرامت، عزت او همدردۍ برخه کې مهم بنسټیز اصول لري او دا اصول نه یوازې د مسلمانانو، بلکې د ټول بشریت لپاره دي.
دغه راز ښاغلي دلاور په خپلو خبرو کې یاده کړه، چې افغاني سره میاشت هم د همدې اسلامي ارزښتونو پر بنسټ په بېلابېلو برخو کې اړمنو، بې سرپرسته او پېښځپلو هېوادوالو ته د اړتیا وړ بشري خدمتونه وړاندې کوي او د زیانمنو لاسنیوی او خدمت خپل شرعي، اخلاقي او انساني مسؤلیت ګڼي.
له بل خوا د آزموینو ملي ادارې رئیس د دې علمي ورکشاپ ګډونوالو ته په تفصیلي توګه د اسلام او نړیوالو بشرپالو قوانینو ترمنځ د اړیکو، همغږۍ او ګډو ارزښتونو، د ځمکې پر مخ د انسانانو د پیدایښت، یو او بل ته د متقابل درناوي او اړتیاوو د پوره کولو برخه کې د اسلامي او نړیوالو بشرپالو قوانینو د اهمیت په اړه خبرې وکړې. نوموړي د الله تعالی د سپېڅلي کلام په رڼا کې د ټولنیز ژوند، اخلاقو، اړیکو، معاملاتو او بشري چلند په هکله هم الهي لارښوونې له ګډونوالو سره شریکې کړې.
د یادونې وړ ده، چې دغه یو ورځني علمي ورکشاپ کې ګډونوالو سره د افغاني سرې میاشتې او نړیوالو ملي ټولنو د پېژندنې، مسئولیتونو او خدمتونو سربېره د اسلام او نړیوال بشرپال قانون په اړه مهم معلومات شریک شول.
