سرپرست عمومي رئیس د ملي ټولنو د نړیوال فدراسیون د آسیا پاسېفېک حوزې له مشر او مل پلاوي سره وکتل
شنبه، ۲ محرم الحرام ۱۴۴۷
د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن د ملي ټولنو د نړیوال فدراسیون د آسیا پاسېفېک حوزې له مشر ښاغلي الکساندر متيو او په افغانستان کې د نړیوال فدراسیون له مسئول ښاغلي سامي الفخوري سره راستنېدونکو کډوالو ته د بېړنیو او اوږدمهاله مرستو د جلب او چمتو کولو په موخه وکتل.
کتنه کې سرپرست عمومي رئیس له ګاونډیو هېوادونو د راستنېدونکو کډوالو د يو دمي راتګ او رامنځته شوي ناورين په اړه راغلي پلاوي سره معلومات شریک کړل، نوموړي زیاته کړه، چې تورخم کې د راستنېدونکو کډوالو حالت نسبتاً مخ په ښه کېدو دی او د کډوالو د راتلو لړۍ هم ورو شوې ده او د افغاني سرې میاشتې کارکوونکي او مسئولین لا هم د کډوالو په خدمت بوخت دي، خو که چېرې د ورته خدماتو لړۍ په هرات او نیمروز ولایتونو کې هم پیل شي، کولی شو د کډوالو ستونزې تر یوې اندازې حل او راکمې کړو.
دغه راز ښاغلي دلاور زياته کړه، ټول هغه امکانات چې د افغاني سرې میاشتې په وس کې وي، راستنېدونکو کډوالو ته له ځنډ پرته رسول کېږي، خو ترڅنګ یې په دې بحراني حالت کې د کاري شریکانو ملاتړ او ښکېلیتا ته لازمه اړتیا ده.
د نړیوال فدراسیون د آسیا پاسېفېک حوزې مشر هرات او نیمروز ولایتونو کې راستنېدونکو کډوالو ته د بېړنیو مرستو برابرول مهم وبلل او زیاته یې کړه، موږ هڅه کوو، چې له نورو کاري شریکانو سره کډوالو ته د لازمو مرستو برابرولو په موخه د همغږۍ بحثونه ولرو، څو د کډوالو ستونزې راکمې او بیرته عادي ژوند ته را وګرځي.
په پای کې دواړو لوریو کډوالو ته د اوږدمهاله مرستو د برابرولو او ستونزو د راکمېدو په اړه د همکارۍ او همغږۍ کچې لوړولو ډاډ څرګند کړ.
