د ظرفیتونو لوړتیا؛ ۴۰ تنه کارکوونکي د ظرفيت لوړونې له لنډ مهاله پروګرام فارغ شول
چهارشنبه، ۱۲ صَفَر ۱۴۴۷
د افغاني سرې میاشتې مرکزي دفتر کې د سرپرست عمومي رئیس ښاغلي شیخ الحدیث شهابالدین دلاور، د نوموړي مرستیال ښاغلي حافظ عزیزالرحمن، د پوهنې وزارت استازي ښاغلي مولوي محمد ابراهیم، د مرکزي ریاست یو شمېر مسئولینو او سلاکارانو په شتون کې د کارکوونکو چارو ریاست اړوند د ظرفیت لوړونې امریت تر چتر لاندې ۴۰ تنو کارکوونکو ته د کمپیوټر او لیک ښکلا برخو کې د زده کړو بشپړولو په موخه فراغت غونډه دایره شوه.
غونډې ته د وینا پر مهال سرپرست عمومي رئیس د علم اهمیت ته په اشارې وویل: " زده کړه د اسلام له نظره ستر ارزښت لري او یوه ټولنه هغه مهال پرمختګ کولی شي، چې وګړي یې لوستي وي."
نوموړي زیاته کړه، چې د ظرفیت لوړونې دا ډول پروګرامونه نه یوازې د کارکوونکو د مسلکي وړتیاوو د پیاوړتیا لامل ګرځي، بلکې د ادارې د خدماتو په لا ښه والي کې مهم رول ادا کوي.
غونډه کې د پوهنې وزارت استازي ښاغلي مولوي محمد ابراهیم او د سرې میاشتې د کارکوونکو چارو ریاست د ظرفیت لوړونې امر ښاغلي ډاکټر عبدالعلیم احمدزي هم د کارکوونکو ظرفیت لوړونې او پوهې د ارزښت په اړه ویناوې وکړې او خپلې پوهې ته د ودې ورکولو ترڅنګ یې نوي څه زده کول د ستونزو د حل یوازینۍ لار وبلله.
یاده فراغت غونډه کارکوونکو ته د تصدیق پاڼو په وېش سره پای ته ورسېده.
