د بېسرپرسته مېرمنو تولیدي توکو ته د بازارموندنې روزنیز ورکشاپ پیل شو
دوشنبه، ۲۹ ربیع الأول ۱۴۴۷
د افغاني سرې مياشتې له لوري، د اتریش د سره صلیب په مالي ملاتړ او د ډنمارک د سره صلیب په تخنیکي همکارۍ، د کابل، هرات، غور او ننګرهار ولایتونو د مرستونونو کارکوونکو ته د بې سرپرسته مېرمنو تولیدي توکو ته د بازارموندنې ۸ ورځنی روزنیز ورکشاپ پيل شو.
ورکشاپ کې، د افغاني سرې میاشتې مرستیال ښاغلي حافظ عزیز الرحمن، د مرستونونو رئیس ښاغلي مولوي سید احمد بهرمند او په افغانستان کې د ډنمارک د سره صلیب مشر ښاغلي محمد شمع حضور درلود.
د افغاني سرې میاشتې مرستیال د ورکشاپ د پرانېستې پر مهال د نړیوالو کاري شريکانو له دوامداره مرستو مننه وکړه، د کونډو او یتیمانو خدمت یې د ټولو ګډ مسئولیت یاد کړ.
نوموړي د ورکشاپ له ګډونوالو وغوښتل، چې د بې سرپرسته مېرمنو د ځان بسياینې لپاره د هغوی تولیدي توکو ته د بازار موندنې په موخه له دې روزنيز ورکشاپ څخه بشپړه ګټه پورته کړي.
همدارنګه، د مرستونونو رئیس ښاغلي بهرمند د بېسرپرسته مېرمنو، یتیمانو او معیوبینو لپاره د وړاندې کېدونکو خدمتونو په اړه معلومات وړاندې کړل او د دې ډول روزنیزو پروګرامونو د لا زیاتوالي غوښتنه وکړه.
په افغانستان کې د ډنمارک د سره صلیب مسٸول وویل: زموږ هدف دا دی، څو بېسرپرسته مېرمنې او کورنۍ په ځان بسيا شي، خپل تولیدات بازار ته وړاندې کړي او د خپل ژوند اړتیاوې په خپله پوره کړي.
په یاد روزنیز ورکشاپ کې به کارکوونکو ته د بېسرپرسته مېرمنو د تولیدي محصولاتو بازارموندنې، د تولیداتو کیفیت لوړونې او د اقتصادي پیاوړتیا په اړه لازمه روزنه ورکړل شي.
