د افغاني سرې میاشتې سرپرست عمومي رئیس ښاغلي مولوي مطیع الحق خالص نن په خپل کاري دفتر کې په کابل کې د ترکیې هېواد له شارژدافیر جنک اونال سره تعارفي ناسته وکړه!
د افغاني سرې میاشتې سرپرست عمومي رئیس ښاغلي مولوي مطیع الحق خالص نن په خپل کاري دفتر کې په کابل کې د ترکیې هېواد له شارژدافیر جنک اونال سره تعارفي ناسته وکړه. ناسته کې د افغاني سرې میاشتې سرپرست عمومي رئیس ښاغلي اونال ته افغانستان ته د راتګ هرکلی ووایه او د ترکیې او افغانستان د ولسونو ترمنځ یې اړیکې د اسلامي اُخوت پر بنسټ تاریخي وبللې. نوموړي وویل "په تېرو ۲ کلونو کې ترکیې له هر چا زیات د افغانانو لاسنیوی کړی او افغاني سرې میاشتې ته یې په سختو حالتونو کې د همکارۍ لاس ورکړی". ښاغلي مولوي مطیع الحق خالص وویل "مونږ د ترکیې د سرې میاشتې منندوی یو، چې له مونږ سره د بشري خدماتو په برخه کې صمیمانه اړیکې لري او فعالیتونه په ګډه مخې ته وړو". نوموړي د ترکیې هېواد شارژدافیر ته ډاډ ورکړ، چې افغاني سره میاشت به په بشري خدماتو کې د ترکیې مرستندویه وي او ترڅنګ به یې ولاړه وي..نوموړي په بشري مرستو کې افغانستان ته د ترکیې د پاملرنې ځانګړې مننه وکړه او څرګنده یې کړه، چې د ترکیې همکاري افغاني سرې میاشتې ته ډېر ارزښت لري. ناسته کې افغانستان کې د ترکیې شارژدافیر ښاغلي جنک اونال افغانستان ته پر خپل راتګ خوښي وښوده او ژمنه یې وکړه،چې افغاني سرې میاشتې سره په همغږۍ به په افغانستان کې د ترکیې بشري مرستې تنظیموي. نوموړي وویل "افغانستان ته د ترکیې یو بل ریل ګاډی مرسته په لاره ده، چې له را رسیدو وروسته به یې د افغاني سرې میاشتې په همکارۍ د پاکستان پولو ته نېږدې پر راستنو شویو کډوالو وویشو".ښاغلي جنک اونال وویل "افغانستان تل په طبیعي ناورینونو کې ښکیل وی، خو مونږ به یې تل لاسنیوی وکړو".
