د افغاني سرې میاشتې سرپرست عمومي رئیس، د قطري سرې میاشتې پروګرامونو له مسئول سره وکتل
سېشنبه، ۲۰ ذو الحجه ۱۴۴۶
د افغاني سرې میاشتې سرپرست عمومي رئیس شیخ الحدیث شهاب الدین دلاور، په خپل کاري دفتر کې قطري سرې میاشتې د پروګرامونو له مسئول احمد عثماني سره وکتل. په دې ناسته کې دواړو لورو د بشري مرستو، د شوو ژمنو د تعقیب او د ګډو همکاریو د پراخولو پر عملي اقداماتو خبرې وکړې.
په پیل کې ښاغلي دلاور قطري سرې میاشتې له مرستو قدرداني وکړه او یادونه یې وکړه چې د پاکو اوبو برابرول، د سوري زړه ناروغانو درملنه او جراحي عملیات، د معلولینو لپاره د وېلچېیرونو برابرول هغه برخې دي چې قطري سرې مياشتې له خوا یې ژمنې شوي دي.
نوموړي ټینګار وکړ چې د دغو ژمنو پلي کول نه یوازې د اړمنو ژوند ته اسانتیا برابروي، بلکې د بشري خدماتو په برخه کې د اغېزناکې همکارۍ یو مهم ګام ګڼل کېږي.
ښاغلي دلاور زیاته کړه چې د افغاني سرې میاشتې ټولنې ته دا ډول شراکتونه ځانګړی اهمیت لري؛ ځکه چې افغاني سره مياشت د هېواد په کچه له بشري اړخه د خدماتو وړاندې کولو یوه مهمه مرجع ده، او له نړیوالو مرستندویه بنسټونو سره همغږي او مرستې کولای شي د ولس ستونزې راکمې کړي.
قطري سرې میاشتې د پروګرامونو مسئول، ښاغلي احمد عثماني ډاډ ورکړ چې د دوی له خوا شوې ژمنې به ژر تر ژره عملي شي. نوموړي وویل چې له مرکزي دفتر سره په همغږۍ هڅه کوي تر دې هم زیاتې مرستې برابرې، او په افغانستان کې د بشري خدمتونو پراخولو ته زمینه برابره کړي.
ښاغلي عثماني همداراز ټینګار وکړ چې قطري سره مياشت د افغانستان له خلکو سره د اوږد مهالو بشري مرستو ژور تعهد لري، او غواړي دا مرستې له ژمنو څخه تر عمل پورې ورسوي، څو اړمنو وګړو ته مستقیمې ګټې ورسېږي.
قطري او افغاني سرو میاشتو تر منځ د همکارۍ دوام کولای شي د یو شمېر حیاتي خدماتو د پیاوړتیا لامل شي
