د افغاني سرې میاشتې د رهبرۍ او کاري شريکانو ترمنځ د همغږۍ د کچې لوړولو او بشري مرستو د جلب په موخه انلاين ناسته ترسره شوه!
د افغاني سرې میاشتې د رهبرۍ او کاري شريکانو ترمنځ د همغږۍ د کچې لوړولو او بشري مرستو د جلب په موخه انلاين ناسته ترسره شوه!
د افغاني سرې میاشتې سرپرست عمومي رئیس ښاغلي شيخ الحديث شهاب الدين دلاور، د نوموړي مرستيال ښاغلي حافظ عزيز الرحمن او سرپرست سکرتر جنرال ښاغلي مولوي روح الله عبدالسلام ددې خيريه ملي ټولنې په مرکزي دفتر کې په افغانستان کې د نړيوال فدراسيون د مسٸول ښاغلي احمد سليمان او د ستراتيژيکي همغږۍ او دېپلوماسۍ د مسٸولې اغلې هُما نادر په شتون کې د ۴۷ نړيوالو کاري شريکانو سره نن چهارشنبه د رمضان میاشتې پر ٢۶مه، د انلاين ناستې په ترڅ کې له افغاني سرې مياشتې د دوامداره ملاتړ، د همغږۍ د کچې لوړولو، اړمنو، بې سرپرسته کورنيو، ناروغانو او راستنېدونکو کډوالو د لاسنيوي په پار د بشري مرستو د جلب او يو شمېر نورو مهمو موضوعاتو په تړاو کتنه وکړه.
د ناستې په پيل کې سرپرست عمومي رئیس د افغاني سرې مياشتې له لوري د هېواد په کچه د ترسره کېدونکو بشرپالو، روغتيايي او ښوونيزو فعاليتونو په اړه تفصيلي معلومات وړاندې کړل او زياته يې کړه چې د تېرو څو لسيزو ناخوالو او اقتصادي ستونزو له امله افغان ولس ډېر زيانمن شوى او د ملي ټولنو او نړيوالو کاري شريکانو په شمول دا زمونږ ګډ مسٸوليت دى څو د افغان وګړو پراخ لاسنيوى وکړو.
دا راز ښاغلي دلاور له کاري شريکانو د مرستونونو، روغتيايي ثابتو کلينيکونو او ګرځنده ټيمونو د پراختيا، د سوري زړه پر رنځ د اخته ناروغانو د درملنې، راستنيدونکو کډوالو ته د بېرنيو مرستو د چمتو کولو او بې سرپرسته کورنيو ته د دوى د ځان بسياينې په موخه د کوچنيو کاروبارونو د رامنځته کولو په برخه کې د ملاتړ غوښتنه وکړه او ډاډ يې ورکړ چې مرستې به مو په پوره شفافيت تر مستحقو وګړو رسوي.
ورپسې په افغانستان کې د آى سي آر سي نړيوالې کمېټې، نړيوال فدراسيون او په ناسته کې د ګډونوالو ملي ټولنو استازو د افغاني سرې مياشتې د بشرپاله فعاليتونو ستاينه وکړه او له دې خيريه ملي ټولنې يې د دوامداره ملاتړ په تړاو د ژمنتيا څرګندولو ترڅنګ ډاډ ورکړ چې د سرپرست عمومي رئیس له لوري وړاندې شويو موضوعاتو ته د رسېدنې په برخه کې به خپلې ګډې هڅې او همکارۍ و نه سپموي.
