آی سي آر سي: له افغاني سرې میاشتې سره بشري همکارۍ ته دوام ورکوو
پنجشنبه، ۱۴ محرم الحرام ۱۴۴۷
د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن مرکزي دفتر کې په افغانستان کې د آی سي آر سي نړیوالې کمېټې له مشرې آغلې کترینا ریټز او مل پلاوي سره وکتل.
کتنه کې د بشري مرستو د پراختیا، په ګډو فعالیتونو کې د لا ښې همغږۍ او د اړمنو کورنیو د لاسنیوي پر موضوعاتو بحث او خبرې وشوې.
ښاغلي دلاور د آی سي آر سي نړیوالې کمېټې د بشري مرستو او هڅو مننه وکړه او د هغوی مرستې یې د بې وزلو او بې سرپرسته کورنیو لپاره مهمې وبللې. دغه راز نوموړي د لازمو همکاریو غوښتنه وکړه او ډاډ یې ورکړ چې د نړیوالو مرستندویه بنسټونو مرستې په بشپړ شفافیت تر اړمنو رسول کېږي.
د آی سي آر سي نړیوالې کمېټې مشرې آغلې ریټز هم له افغاني سرې میاشتې سره د ګډ کار پر دوام ټينګار وکړ او د دې ملي ټولنې د فعالیتونو ستاینه یې وکړه.
نوموړې ژمنه وکړه چې د اړمنو او بې وزلو اړتیاوو ته په کتو به بشري مرستې دوام ولري.
په پای کې دواړو لوریو ټینګار وکړ چې له بنسټیزو اصولو سره سم به خپلو همکاریو ته دوام ورکړي او د بې سرپرسته او اړمنو کورنیو د بشري اړتیاوو د پوره کولو په موخه به اغېزمن پلانونه هم جوړ کړي.
