هرات ولایت کې ۴۰۰۰ تنو د سترګو ناروغانو ته د درملنې او عملیات بهیر پیل شو!
هرات ولایت کې ۴۰۰۰ تنو د سترګو ناروغانو ته د درملنې او عملیات بهیر پیل شو!
د افغاني سرې مياشتې په همکارۍ، د البصر خیریه بنسټ د ډاکټرانو په تخنيکې مرسته او د ملک سلمان مرستندویه بنسټ په مالي ملاتړ په هرات ولایت کې ۴۰۰۰ تنو د سترګو ناروغانو لپاره د درملنې او عملیات څلور ورځنی پروګرام د افغاني سرې میاشتې د لویدیځ زون د رئیس الحاج ډاکټر عبد البصیر رحماني او د یادو بنسټونو د استازو په شتون د یوې غونډې په ترڅ کې نن شنبه د ذو القعدې د میاشتې پر ۱۹مه رسماً پیل شو.
د غونډې په پیل کې د لویدیځ زون رئیس د ملک سلمان مرستندویه بنسټ له دې ډول سخاوتمندانه همکاریو مننه وکړه او د دوی نقش یې د خلکو د کړاوونو په را کمولو کې مهم او ارزښتناک وباله.
ورپسې د البصر او ملک سلمان خیریه بنسټونو استازو د افغاني سرې میاشتې له رهبرۍ څخه هېوادوالو ته د بشرپالو خدماتو د وړاندې کولو قدرداني وکړه او د دوی هڅې یې وستایلې.
د یادونې وړ ده، چې په دې پروګرام کې به ۴۰۰۰ تنو ته د سترګو معاینات ترسره شي، ۱۰۰۰ تنو ناروغانو ته به د سترګو عینکې ورکړل شي او له ۴۰۰ څخه زیاتو ناروغانو ته به عملیات ترسره شي.
