د افغاني سرې میاشتې او غالب پوهنتون تر منځ درې کلن هوکړه لیک لاسلیک شو!
د افغاني سرې میاشتې د سرپرست عمومي رئیس ښاغلي مولوي مطیع الحق خالص او د غالب پوهنتون د استازي دوکتور مفتي محمد اسحاق نوري ترمنځ د ګډو همکاریو دوه اړخیز هوکړه لیک لاسلیک شو.
د یاد هوکړه لیک پر بنسټ به غالب پوهنتون د کال په هر سمستر کې هغو ۵ تنو ته د لیسانس د دورې ۵ سکالرشیپونه ورکوي، چې د افغاني سرې میاشتې له لوري غالب پوهنتون ته ور وپېژندل شي. همدا ډول به د افغاني سرې میاشتې له لوري ۵ ور پېژندل شویو کسانو ته د غالب پوهنتون د روغتیایي زده کړو. په انسټیټیوټ کې وړیا شمولیت ورکول کېږي. د هوکړه لیک پر بنسټ به غالب پوهنتون د افغاني سرې میاشتې له لوري ۲۰ ورپېژندلو محصلینو ته ۵۰ سلنه تخفیف هم ورکوي. همدا ډول هر کال به د انګلیسي ژبې د زده کړې په برخه کې د افغاني سرې میاشتې له لوري ۱۰ ورپېژندل شویو زده کوونکو کې ۳ تنو ته وړیا او ۷ نورو ته په ۵۰ سلنه تخفیف زده کړه ورکول کېږي. ددې تر څنګ به د غالب پوهنتون د معالجوي طب او غاښونو طب څانګې د افغاني سرې میاشتې د کارکوونکو او رضاکارانو مرسته کوي. د هوکړه لیک له مخې به افغاني سره میاشت په هرات ولایت کې خپلو کلینیکونو کې د غالب پوهنتون ستاژ د دورې محصلین مني.
