د اقتصادي پیاوړتیا پر لور؛ ننګرهار کې ۱۰۰ زلزله ځپلو کورنیو ته معیشتي مرستې ورکړل شوې
سې شنبه، ۹ ذو الحجه ۱۴۴۷
د افغاني سرې میاشتې له لوري د ننګرهار ولایت د دره نور ولسوالۍ ۱۰۰ زلزله ځپلو کورنیو ته د اقتصادي پیاوړتیا او ځان بسیاینې په موخه معیشتي مرستې ورکړل شوې.
دغه مرستې، چې د ډنمارک سره صلیب په ملاتړ چمتو شوې وې، له مخې یې ۹۹ کورنیو ته هرې کورنۍ ته درې ـ درې حامله وزې، اړوند واکسینونه او درمل وسپارل شول او يوې هغې کورنۍ ته، چې د خیاطۍ په برخه کې یې تجربه لرله، د خیاطۍ وسایل ورکړل شول.
تمه ده، چې یادې کورنۍ به د دغو مرستو له لارې وکولای شي په راتلونکي کې دوامدار عايد ترلاسه کړي او خپل اقتصادي وضعیت تر یوې اندازې ښه کړي.
افغاني سره میاشت هڅه کوي د طبیعي پېښو له امله زیانمنو کورنیو ته د معیشتي او اقتصادي پروګرامونو له لارې د دوامدار عاید او ځان بسیاینې زمینه برابره کړي.
