لوګر کې ۲۰۰ راستنو شوو کورنیو د ۲ میلیونه افغانیو په ارزښت خوراکي مرسته ترلاسه کړه
دوشنبه، ۱۳ رمضان ۱۴۴۷
افغاني سرې میاشتې لوګر ولایت کې له ۲۰۰ راستنو شوو کډوالو کورنیو سره د ۲ میلیونه افغانیو په ارزښت د ۱۷.۵ ټنه خوراکي توکو مرسته وکړه.
په مرسته کې هرې کورنۍ ته د لس زره افغانیو په ارزښت ۸۷.۵ کیلو خوراکي توکي ورکړل شول، چې پکې ۱۰ لیټره غوړي، ۲۰ کیلو وریژې، ۱۰ کیلو دال، ۵ کیلو بوره، ۱.۵ کیلو مالګه، ۲۰ پاکټه مکروني، ۱ کیلو وچې شیدې، ۸ کیلو خُرما او ۱۰ پاکټه بیسکټ شامل وو.
سربېره پر دې هرې کورنۍ ته ۱ د روغتیا ساتنې بسته هم ورکړل شوه.
دغه مرسته د روژې په میاشت کې د اړمنو کورنیو د لومړنیو اړتیاوو د پوره کولو او د هغوی د اساسي ستونزو د را کمولو په موخه ترسره شوه.
افغاني سره میاشت د بشري مرستو له لارې هڅه کوي؛ څو د راستنو شوو هېوادوالو پر وخت لاسنیوی وکړي او د هغوی د ژوند اساسي اړتیاوې تر یو حده پوره کړي.
