هرات؛ د کونړ زلزله ځپلو لپاره د ترکیې سرې میاشت ۹۲۲ ټنه د بشري توکو مرسته افغاني سرې میاشتې ته وسپارله
جمعه، ۳ ربیع الآخر ۱۴۴۷
د ترکیې سرې میاشتې له لوري د کونړ ولایت د وروستۍ زلزلې له زیانمنو کورنیو سره د ۹۲۲ ټنه د خوراکي او غیر خوراکي خوراکي توکو مرسته د اورګاډي له لارې هرات ولايت ته راورسېده.
یاده بشري مرسته د هرات په روزنک د اوسپنۍ پټلۍ تم ځای کې د یو لړ ځانګړو مراسمو په ترڅ کې، د افغانستان لپاره د ترکیې سفیر جنک اونال په لاس د افغاني سرې میاشتې مرستیال ښاغلي حافظ عزیز الرحمن ته وسپارل شوه.
په مراسمو کې په افغانستان کې د ملي ټولنو نړیوال فدراسیون د پروګرامونو مسئول ښاغلي احمد سلیمان، افغانستان کې د ترکیې سرې میاشتې رئیس ښاغلي نعیم الله کریمي، د مرکزي او سیمه ییزو دفاترو مسئولینو او یو شمېر دولتي چارواکو هم ګډون درلود.
د افغاني سرې میاشتې مرستیال د ترکیې له همېشنیو مرستو مننه وکړه او ویې ویل: دا بشري مرسته د زلزلې له زیانمنو وګړو سره د انساني همدردۍ ښکاره ثبوت دی او افغاني سره میاشت ژمنه ده، چې په بشپړ شفافیت سره به یې تر مستحقو کورنیو رسوي.
په افغانستان کې د ترکیې سفیر ښاغلي جنک اونال په خپلو خبرو کې وویل: "دا ۹۲۲ ټنه مرسته، چې خوراکي او غیر خوراکي توکي په کې شامل دي، د طبیعي پېښو له امله زیانمنو، په ځانګړي ډول د کونړ زلزله ځپلو کورنیو لپاره افغانستان ته رالېږل شوې، څو په دې بېړني حالت کې زیانمنې کورنۍ ترې ګټه واخلي او تر یو حده یې د ژوند لومړنۍ اړتیاوې پوره کړي.
نوموړي ټینګار وکړ، چې ترکیه به تل د افغان ولس سره په سختو شرایطو کې ولاړه وي.
