د ختیځ زون د مرستون ممتاز زده کوونکي وستایل شول
یکشنبه، ۹ صَفَر ۱۴۴۷
د افغاني سرې میاشتې له لوري، ننګرهار ولایت کې د مرستون هغه زده کوونکي، چې په بېلابېلو ښوونځیو کې په عالي درجو بریالي شوي و؛ د جلال اباد ښار د پوهنې امريت، ښوونځيو، ښوونيزو مرکزونو، انسټیتيوټونو او یو شمېر نورو بنسټونو د مسئولینو په شتون کې، د یوې غونډې په ترڅ کې د ډالیو او انعامونو په ورکړې سره وستایل شول.
غونډه کې د افغاني سرې میاشتې د ختيځ زون سيمه ييز رئيس مولوي قمرګل نصرت په خپلو خبرو کې وويل: " دلته د يتيمانو کامله روزنه، پالنه او سرپرستي د دوی د ښه راتلونکي په هدف تر سره کېږي، د نن دا ماشومان د سبا لويان دي، چې سمه روزنه یې د ټولنې او هېواد د خدمت او پرمختګ مصدر ګرځي. موږ هڅه کوو، څو د دې يتيمانو درس، روزنې، اخلاقو، حرفوي زده کړو او نورو اړخونو ته ځانګړې پاملرنه وکړو."
افغاني سرې میاشتې تل هڅه کړې، څو د بې سرپرسته کورنیو ماشومانو ته د ژوند د نورو اسانتیاوو تر څنګ د ښوونې او روزنې زمینه برابره کړي، دا مهال د مرستونونو سربېره په ښوونیزو مرکزونو کې هم سلګونه یتیمان او د بې وزله کورنیو ماشومان په زده کړو بوخت دي.
