د افغاني سرې میاشتې سرپرست عمومي رئیس د اسلامي هېوادونو د سرو میاشتو د نړیوالې کمیټې (ICIC) له مشر سره د سعودي عربستان د جدې په ښار کې لیدنه ترسره کړه!
د افغاني سرې میاشتې سرپرست عمومي رئیس ښاغلي مولوي مطیع الحق خالص د اسلامي هېوادونو د سرو میاشتو د نړیوالې کمیټې (ICIC) له مشر السفیر محمد علي بوهدمه او اجرایوي مدیر دوکتور محمد العسبلي سره د سعودي عربستان د جدې په ښار کې لیدنه ترسره کړه. ناسته کې د افغاني سرې میاشتې سرپرست عمومي رئیس د اسلامي هېوادونو د سرو میاشتو د نړیوالې کمیټې د اٌمورو د لا اغېزمنتوب او پرمختګ په اړه مشورې شریکې کړې او د افغانستان پر شته وضعیت او ستونزو یې خبرې وکړې. نوموړي غوښتنه وکړه چې د کمزورو او اړو اسلامي هېوادونو په اړه باید د اسلامي هېوادونو د سرو میاشتو نړیواله کمیټه خپل مسؤلیت ترسره کړي او باید د اسلامي هېوادونو د سرو میاشتو د پرمختګ، یووالي او پیاوړتیا لپاره کار وکړي. د اسلامي هېوادونو د سرو میاشتو د نړیوالې کمیټې رئیس السفیر محمد علي بوهدمه د ښاغلي مولوي مطیع الحق خالص سپارښتنې او مشورې ګټورې وبللې او هیله یې وښوده چې افغاني سره میاشت به د اسلامي هېوادونو د سرو میاشتو نړیواله کمیټه کې فعال او اغېزمن رول ولري. نوموړي غوښتنه وکړه چې افغاني سره میاشت دې دوی سره خپلې ستونزې، اړتیاوې او پروژې شریکې کړي؛ ترڅو دوی د یادو پروژو د تطبیق او د اړتیاو پوره کولو ته په اسلامي هېوادونو کې مرستندوی ومومي.
