کابل؛ دیني عالمانو ته د نړیوال غورځنګ او ملي ټولنو د پېژندنې په اړه روزنیز ورکشاپ ترسره شو
پنجشنبه، ۲۲ صفر ۱۴۴۸
د افغاني سرې میاشتې د حقوقي ریاست په نوښت او د سره صلیب نړیوالې کمېټې په مالي ملاتړ، په کابل کې یو شمېر دیني عالمانو ته د سرو میاشتو او سرو صلیبونو د نړیوال غورځنګ د بنسټیزو اصولو، د ملي ټولنو د نقش او د هغوی د بشري فعالیتونو په اړه یو ورځنی روزنیز ورکشاپ ترسره شو.
د ورکشاپ د پرانیستې پر مهال د افغاني سرې میاشتې د دعوت او ارشاد رئیس، شیخ الحدیث احمد نور حنیف، وویل چې افغاني سره میاشت د اسلامي او بشري ارزښتونو پر بنسټ بې سرپرستو، اړمنو او د پېښو له امله زیانمنو کورنیو ته بشري مرستې او اړین خدمات وړاندې کوي. هغه ټینګار وکړ چې دیني عالمان د بشرپالنې، همکارۍ او انساني ارزښتونو د ترویج، د عامه پوهاوي د لوړولو او د ټولنې د اخلاقي ارزښتونو د پیاوړتیا په برخه کې مهم رول لري.
په ورکشاپ کې ګډونوالو ته د سرو میاشتو او سرو صلیبونو د نړیوال غورځنګ د تاریخچې، اووه ګونو بنسټیزو اصولو، نښانونو، د ملي ټولنو د بشري خدمتونو او فعالیتونو او د بشرپالنې د ارزښتونو په اړه هر اړخیز معلومات وړاندې شول.
