خوست کې ۲۷۰ بېځایه شویو کورنیو ته د پاکو اوبو د لاسرسي اسانتیا برابره شو
سې شنبه، ۲۳ ذو الحجه ۱۴۴۷
د افغاني سرې مياشتې له لوري د خوست ولایت په علیشېرو او ګربزو ولسوالیو کې د ملي ټولنو نړیوال فدراسیون په مالي ملاتړ ۲۷۰ داخلي بېځایه شویو کورنیو لپاره پاکو اوبو ته د لاسرسي زمینه برابره شوه.
د افغاني سرې میاشتې د خوست ولایتي نمایندګۍ رئیس، شیخ الحدیث محمد ولي جان عدالت یار، وویل چې دغو کورنیو د څښاک پاکو اوبو ته کافي لاسرسی نه درلود او د غیر صحي اوبو د کارونې له امله یې ماشومان په بېلابېلو ناروغیو اخته کېدل.
نوموړي زياته کړه، ددې ستونزې د هواري او خلکو ته د پاکو اوبو د رسېدو د زمینې برابرولو لپاره يې یاد اقدام ترسره کړ.
ددې پروژې له مخې، په یادو سیمو کې لس د اوبو ټانکۍ نصب شوې چې هره یوه یې د ۱۰۰۰ لیټره اوبو ظرفیت لري. دغه ټانکۍ به هره ورځ د اوبو ټانکرونو له لارې ډکېږي او کورنۍ به ترې د څښاک او نورو اړینو اړتیاوو لپاره ګټه اخلي.
د دې کار موخه خلکو ته د پاکو اوبو د رسېدو زمینه برابرول، د اوبو د کمښت ستونزه کمول او د اوبو له لارې د خپرېدونکو ناروغیو مخنیوی دی.
افغاني سره میاشت هڅه کوي د پاکو اوبو او روغتیا ساتنې د پروګرامونو له لارې د زیانمنو او بېځایه شویو کورنیو د ژوند شرایط ښه او روغتیايي ستونزې راکمې کړي.
