کونړ؛ د افغاني سرې میاشتې مرستیال د زلزله ځپلو لپاره له جوړ شوي پنډغالي لیدنه وکړه
یکشنبه، ۱۲ ربیع الآخر ۱۴۴۷
د افغاني سرې میاشتې مرستیال، ښاغلي حافظ عزیز الرحمن د کونړ ولایت په نورګل ولسوالۍ کې د زلزله ځپلو لپاره له جوړ شوي پنډغالي څخه لیدنه وکړه.
لیدنه کې ښاغلي مرستيال، پنډغالي کې د زلزله ځپلو لپاره کې د نصب شوو خېمو، پخو خوړو ، د څښاک اوبو رسولو، روغتیایي او نورو بشري مرستو د وېش بهير له نږدې و ارزوه.
نوموړي له زلزله ځپلو کورنیو سره خبرې وکړې او د هغوی د ستونزو د اورېدلو ترڅنګ یې خپله خواخوږي هم څرګنده کړه.
ښاغلي عزیز الرحمن وویل: افغاني سره میاشت به د زلزله ځپلو تر څنګ د هر ډول بشري خدمتونو لپاره ولاړه وي او د دوی هر ډول ستونزو ته به پر وخت رسېدنه کوي.
په ورته مهال، ښاغلي مرستيال له ۱۶۱ زلزله ځپلو کورنيو سره د برېښنايي اسانتياوو برابرولو په موخه د لمريزې برښنا اړوند ۷ قلمه توکو د وېش پروګرام کې هم ګډون وکړ، چې په کې هرې کورنۍ ته یو سولري تخته، بطرۍ، باد پکه، کنټرولر، لس متره برقي تار، ۳ بوتله تېزاب او دوه څراغونه ورکړل شول.
