بلخ؛ زلزله ځپلو کورنیو ته د عایداتي سرچینو د برابرولو لپاره مرستې ووېشل شوې
دوشنبه، ۱۲ صفر ۱۴۴۸
د افغاني سرې میاشتې له لوري د بلخ ولایت په البرز ولسوالۍ کې پر ۶۵ زلزله ځپلو کورنیو د عایداتي سرچینو د برابرولو او ځان بسياينې په موخه مرستې وشوې.
دغه مرستې، چې د ډنمارک سره صلیب په مالي ملاتړ برابرې شوې وې، له مخې یې ۶۳ کورنیو ته، هرې کورنۍ ته دوه ـ دوه مېږې او دوو نورو کورنیو ته د خیاطۍ بشپړ وسایل ورکړل شول، څو د کار او عاید زمینه ورته برابره شي.
د مرستو موخه دا وه څو زلزله ځپلې کورنۍ د خپلو اړتیاوو د پوره کولو لپاره د عاید سرچینې پیدا کړي، پر خپلو پښو ودرېږي او پر مرستو یې تکيه کمه شي.
افغاني سره میاشت د طبیعي پېښو له امله زیانمنو کورنیو د ملاتړ په موخه د بېړنیو بشري مرستو ترڅنګ د عاید پیدا کولو پروګرامونه هم پلي کوي، څو کورنۍ وکولای شي خپل ژوند بېرته عادي حالت ته راولي.
