ننګرهار او جوزجان کې د وروستیو سېلابونو له امله ۴۲ زیانمنو کورنیو ته نغدي مرسته ورسول شوه
پنجشنبه، ۲۰ ذو القعده ۱۴۴۷
د افغاني سرې میاشتې له لوري د ننګرهار ولایت د جلال آباد ښار او د پچیرآګام، خوګیاڼیو، نازیانو، شېرزادو، چپرهار، بهسودو، سپین غر، هسکې مېنې، غني خېلو او سرخرود ولسوالیو ۳۹ کورنیو او د جوزجان ولایت د مرکز شبرغان ښار او درزاب ولسوالۍ ۳ زیانمنو کورنیو ته، چې د وروستیو سېلابونو له امله ورته ځاني او مالي زیانونه اوښتي وو، ټولټال یو میلیون او ۲۶۰ زره افغانۍ نغدي مرسته ورسول شوه.
دغه مرسته د چین سره صلیب په مالي ملاتړ برابره شوې وه، چې له مخې یې هرې کورنۍ ته د اساسي اړتیاوو د پوره کولو په موخه ۳۰ زره افغانۍ ورکړل شوې.
افغاني سره میاشت هڅه کوي، د طبیعي پېښو پر مهال زیانمنو هېوادوالو ته پر وخت رسېدنه وکړي او د بېړنیو مرستو له لارې د هغوی اساسي اړتیاوې پوره کړي.
