هلمند؛ د افغاني سرې میاشتې له ښوونیز مرکز څخه ۱۳۰ زده کوونکي فارغ شول
چهارشنبه، ۱۵ رمضان ۱۴۴۷
د افغاني سرې میاشتې د هلمند ولایت د ځوانانو او رضاکارانو په ښوونیز مرکز کې د اداري مهارتونو په برخه کې ۱۳۰ تنه زده کوونکي د درې میاشتنیو زده کړو تر بشپړولو وروسته فارغ شول.
په یاد ښوونیز مرکز کې دا مهال شاوخوا ۷۰۰ تنه هغه زده کوونکي، چې په شخصي ښوونیزو مرکزونو کې د فیس ورکولو توان نه لري؛ په بېلابېلو برخو کې په وړیا ډول لنډمهاله زده کړې ترلاسه کوي.
د یادونې وړ ده، چې څه موده وړاندې هم له همدې ښوونیز مرکز څخه ۱۲۰ تنه زده کوونکي د اداري مهارتونو په برخه کې د زده کړو تر بشپړولو وروسته فارغ شوي وو.
افغاني سره میاشت هڅه کوي؛ څو د خپلو ښوونیزو مرکزونو له لارې اړمنو ځوانانو ته د مسلکي زده کړو زمینه برابره کړي.
