فراه؛ ۱۳۰ سېلاب ځپلو کورنیو ته نغدي مرسته ورکړل شوه
سې شنبه، ۸ شعبان ۱۴۴۷
د افغاني سرې میاشتې له لوري د فراه ولایت په څلورو (ګلستان، بالابلوک، فراه رود، بکواه) ولسوالیو کې له ۱۳۰ سېلاب ځپلو کورنیو سره یو میلیون او درې سوه پنځه شپېته زره (۱،۳۶۵،۰۰۰) افغانۍ نغدي مرسته وشوه، چې هرې کورنۍ ته ۱۰،۵۰۰ افغانۍ ورکړل شوې.
دغه مرسته به د یادو کورنیو ورځنۍ او بېړنۍ اړتیاوې تر یوې کچې پوره او اساسي ستونزې را کمې کړي.
افغاني سره میاشت د خپلو بنسټیزو اصولو پر بنسټ د خوراکي، غیر خوراکي توکو، روغتیایي خدمتونو او د ژوند ژغورنې نورو آسانتیاوو په برابرولو سره هڅه کوي، څو د سېلاب ځپلو ستونزې را کمې او د هغوی اړتیاوو ته پر وخت رسېدنه وکړي.
