کډوالو، اړمنو او پېښځپلو لاسنیوی؛ د افغاني سرې میاشتې او ترکیې آی اېچ اېچ بنسټ ترمنځ ناسته وشوه
یکشنبه، ۲۱ رجب ۱۴۴۷
د افغاني سرې میاشتې د مرستیال، ښاغلي حافظ عزیزالرحمن، په افغانستان کې د ترکیې د آی اېچ اېچ خیریه بنسټ د مسؤول ښاغلي سلیمان ایپلي او مل پلاوي تر منځ د کډوالو، پېښځپلو او بې سرپرسته کورنیو د لاسنیوي او همکاریو د دوام په موخه ناسته وشوه.
د افغاني سرې میاشتې مرستیال خپلو خبرو کې د ترکیې هېواد او خیریه بنسټونو مرستې د اړمنو، بې سرپرسته او زیانمنو شوو کورنیو لپاره خورا مهمې وبللې او زیاته یې کړه، چې بشري مرستې د ناورینونو د مدیریت او خلکو د ستونزو کمولو برخه کې اغېزمنې دي. نوموړي د آی اېچ اېچ خیریه بنسټ له مسؤولینو غوښتنه وکړه؛ څو د پېښځپلو او راستنېدونکو کډوالو لوړ شمېر ته په کتو خپلې مرستې لا پراخې کړي او ډاډ یې ورکړ، چې سره میاشت دې برخه کې د هر ډول اسانتیاوو برابرولو ته چمتو ده.
په افغانستان کې د ترکیې د آی اېچ اېچ خیریه بنسټ مشر د افغاني سرې میاشتې له لارې د بشري فعالیتونو د پراختیا ډاډ څرګند کړ او زیاته یې کړه، کوښښ کوو له افغاني سرې میاشتې سره په ګډه د کډوالو، بې سرپرسته او زلزله ځپلو کورنیو ستونزو ته پر وخت رسېدنه وکړو او دې برخه کې خپلې مرستې لا ډېرې کړو.
