بلخ؛ د ازبکستان ۴۰۰ ټنه بشري مرسته افغاني سرې میاشتې ته وسپارل شوه
سې شنبه، ٩ رجب ۱۴۴۷
د ازبکستان هېواد له لوري را استول شوې ۴۰۰ ټنه د خوراکي توکو او طبي درملو بشري مرسته په بلخ کې د يوې غونډې پر مهال د افغاني سرې میاشتې ټولنې ته وسپارل شوه. غونډه کې د بلخ والي ښاغلي الحاج ملا محمد يوسف وفا، د افغاني سرې میاشتې د شمال زون رئيس ښاغلي ملا محمد حنيف خالد، د نمايندګۍ رئيس قاري محمد يونس معصومي، د ازبکستان د جمهور رئيس ځانګړي استازي ښاغلي عصمت الله ايرګشوف، د ياد هېواد د سرخان دريا ولايت والي الوغ بيګ قاسموف او يو شمېر نور ولايتي چارواکو ګډون درلود.
د بلخ والي په خپلو خبرو کې وويل، ازبکستان له هغو هېوادونو څخه دی چې له افغانستان سره يې د طبيعي او غير طبيعي پېښو پر مهال دوامداره بشري مرستې ترسره کړي دي. نوموړي په نننۍ مرسته د ازبکستان له حکومت او راغلي پلاوي مننه وکړه او زياته يې کړه، چې دا ډول همکارۍ د افغان ولس لپاره ډېر ارزښت لري.
ورپسې د ازبکستان د جمهور رئيس ځانګړي استازي په خپلو څرګندونو کې ډاډ وښود، چې هېواد يې په بېړنيو حالاتو کې تل د افغانانو سره خواخوږي ښودلې او د ورته بشري مرستو د پراختيا برخه کې به خپلو هڅو ته دوام ورکړي.
د افغاني سرې میاشتې د شمال زون رئيس په خپلو خبرو کې وويل، چې د سرې مياشتې د مشرتابه د لارښوونې او د يوې شفافې پروسې له مخې به ياده مرسته پر مستحقو، اړمنو او پېښځپلو هېوادوالو ووېشل شي. هغه ټينګار وکړ، چې افغاني سره مياشت هڅه کوي، څو د هېواد په کچه بشرپاله مرستې د خلکو اړتياوو ته په کتو په عادلانه ډول ووېشي.
په مرسته شوو توکو کې ٩۶ ټنه اوړه، ٢٢ ټنه وريجې، ٢٢ ټنه بوره، ٢٠٠٠٠ لېتره غوړي، ۴۰ ټنه مکروني، ٢٠٠٠٠ قطۍ د غوښې کانسرو، ١٨٠٠٠٠ خوراکه ګرمه غذا او ۱۶۹ ټنه بېلابېل طبي درمل شامل وو.
