د خوندي لاسرسي په اړه درې ورځنی روزنیز ورکشاپ دایر شو
دوشنبه، ۱۲ جمادى الأولى ۱۴۴۷
د افغاني سرې میاشتې اړوند د ساتنې او خوندیتوب ریاست د مرکز او سیمه ایزو زونونو د ۲۰ کارکوونکو لپاره د آی سي آر سي په مالي ملاتړ د خوندي لاسرسي په اړه درې ورځنی روزنیز ورکشاپ پیل شو.
د ورکشاپ د پرانېستې پر مهال د افغاني سرې میاشتې د ساتنې او خوندیتوب رئیس ښاغلي مولوي عبدالباقي خيرخواه د خوندي لاسرسي د چوکاټ، موخو، میتودونو او وسایلو په اړه د پوهاوي ترلاسه کولو لپاره دا ډول ورکشاپونه ګټور وبلل او دې برخه کې یې د آی سي آر سي له همېشنیو همکاریو مننه وکړه.
دې ورکشاپ کې به ګډونوالو ته د خوندي لاسرسي چوکاټ سره د آشنایۍ، عناصرو، کاریدونکو لارو چارو او موخو په اړه معلومات وړاندې شي، څو وکولی شي، په بحراني حالاتو کې د کارکوونکو خوندیتوب ته پام وشي، اووه ګونو بنسټيزو اصولو له مخې بشرپال فعالیتونه پر وخت ترسره شي او د خطرونو د ارزونې او مدیریت برخه کې ګړندۍ هڅې وکړي.
