عمومي رئیس د نړیوال فدراسیون له نوي سرپرست سره د کډوالو د ستونزو د حل په موخه وکتل
شنبه، ۶ ربیع الأول ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور د افغانستان لپاره د ملي ټولنو نړیوال فدراسیون له نوي سرپرست مسئول ښاغلي جُی سینګال او د نوموړي له مرستیال ښاغلي احمد سلیمان سره راستنېدونکو کډوالو ته د بشري مرستو برابرولو په موخه وکتل.
کتنه کې د افغاني سرې میاشتې عمومي رئیس د کاري شریکانو په ځانګړې توګه د نړیوال فدراسیون د مرستو مننه وکړه او راستنېدونکو کډوالو ته بېړنۍ مرستې، روغتیايي خدمتونه، د څښاک پاکې اوبه او لنډ مهاله سرپناه برابرول یې د افغاني سرې میاشتې لومړیتوبونه وګڼل. نوموړي زیاته کړه، چې په دې وروستیو کې یو ځل بیا د بېرته راستنېدونکو هېوادوالو شمېر زیات شوی او پراخو بشري مرستو ته اړتیا لري.
ښاغلي سینګال د راستنېدونکو کډوالو د ستونزو د حل، هغوی ته د پخو خوړو برابرولو، بېړني لاسنیوي او د افغاني سرې میاشتې له لارې د خپلو مرستو د جاري ساتلو ژمنه وکړه، څو په ګډه د کډوالو او بې وسه وګړو ستونزو ته پر وخت رسېدنه وشي.
