بلخ؛ پر ۴۳۷ اړمنو کورنیو نږدې ۱۳ ټنه خوراکي توکي ووېشل شول
پنجشنبه، ۲۲ صفر ۱۴۴۸
د افغاني سرې میاشتې له لوري د بلخ ولایت د بېلابېلو ولسوالیو او د مزارشریف ښار د يو شمېر ناحیو پر ۴۳۷ اړمنو کورنیو نږدې ۱۳ ټنه خوراکي توکي ووېشل شول.
یاده مرسته د ازبکستان هېواد په ملاتړ چمتو شوې وه، چې له مخې یې هرې کورنۍ ۱۰ لېټره غوړي، ۱۰ کیلوګرامه لوبیا او ۹ کیلو ګرامه بسکویټ ترلاسه کړل، څو د خپلو خوراکي اړتیاوو یوه برخه پرې پوره کړي.
افغاني سره میاشت د خپلو کورنیو او نړیوالو کاري شریکانو په همکارۍ هڅه کوي، چې د خوراکي مرستو د پروګرامونو له لارې پر اړمنو کورنیو د اړتیاوو پر بنسټ مرستې ووېشي او د هغوی د خوراکي خوندیتوب د پیاوړتیا برخه کې اغېزمنه ونډه واخلي.
