کابل؛ د افغاني سرې مياشتې عمومي رئيس د آی سي آر سي له نوي مشر سره د بشري همکاريو پر پراختيا خبرې وکړې
چهارشنبه، ۲۶ ذوالقعده ۱۴۴۷
د افغاني سرې مياشتې عمومي رئيس شيخ الحديث شهاب الدين دلاور او د نوموړي مرستيال حافظ عزيز الرحمن په مرکزي دفتر کې د افغانستان لپاره د آی سي آر سي له نوي مشر جوهانس بروور سره د بشري همکاريو او د اړيکو د پراختيا په اړه خبرې وکړې.
شيخ الحديث شهابالدين دلاور د آی سي آر سي له دوامدارو همکاريو مننه وکړه او ويې ويل، افغاني سره مياشت هيله لري، چې د دواړو ادارو ترمنځ به بشري همکارۍ لا پراخې او اغېزمنې شي.
نوموړي همدارنګه د افغانستان لپاره د آی سي آر سي له پخوانۍ مشرې کترينا ريټز څخه د هغې د همکاريو او بشري خدمتونو له امله مننه وکړه او د نوي مشر جوهانس بروور راتګ يې د دواړو ادارو ترمنځ د همکاريو د لا پياوړتيا لپاره مهم وباله.
ورپسې د آی سي آر سي نوي مشر جوهانس بروور د افغاني سرې مياشتې د بشري فعاليتونو ستاينه وکړه او د ګډو بشري خدمتونو پر دوام يې ټينګار وکړ.
هغه زياته کړه، چې آی سي آر سي به هم له افغاني سرې مياشتې سره د بشري خدمتونو او مرستو په برخه کې خپلو همکاريو ته دوام ورکړي.
