سرپل کې ۵۰۰ کورنیو ته د خوراکي او غیر خوراکي توکو مرسته ورکړل شوه
شنبه، ۲۲ ذو القعده ۱۴۴۷
د افغاني سرې میاشتې له لوري د سرپل ولایت د مرکز اړوند د بالاکېنت سیمې او سانچارک ولسوالۍ ۵۰۰ راستنو شویو او سېلاب ځپلو کورنیو ته د خوراکي او غیر خوراکي توکو مرسته ورکړل شوه.
دغه مرسته د ازبکستان هېواد په ملاتړ چمتو شوې وه، چې له مخې یې هرې کورنۍ ته ۵۰ کیلو اوړه، ۱۰ لېټره غوړي، ۱۸ کیلو وریژې، ۹ کیلو بوره، ۹.۵ کیلو مکروني، ۳۸ پاکټه آش، ۵ کیلو بسکویټ، یو جوړ څپلۍ او یو شمېر نور اړین توکي ووېشل شول.
تمه ده، دغه مرسته به د یادو کورنیو د لومړنیو اړتیاوو په پوره کولو کې اغېزمنه تمامه شي.
افغاني سره میاشت هڅه کوي راستنو شویو او د طبيعي پېښو له امله زیانمنو کورنیو ته د بشري مرستو له لارې د هغوی لومړنۍ اړتیاوې پر وخت پوره کړي.
