عمومي رئیس په افغانستان کې د یوناما د بشري حقونو څانګې له مسئولې سره وکتل
چهارشنبه، ۱ ربیعالآخر ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور، په افغانستان کې د یوناما د بشري حقونو څانګې له مشرې آغلې فیونا فریزر او مل پلاوي سره د پېښځپلو، اړمنو او راستنېدونکو کډوالو سره د مرستو د پراختیا په موخه وکتل.
کتنه کې ښاغلي دلاور د افغاني سرې میاشتې د مرکزي او سیمه ییزو څانګو له لارې پېښځپلو، بې سرپرسته کورنیو، معیوبینو، د سوري زړه په ناروغۍ اخته ماشومانو او نورو بېلابېلو برخو کې هېوادوالو ته د وړاندې کېدونکو خدمتونو په اړه خبرې وکړې او زیاته یې کړه، چې افغاني سره میاشت دا مهال په ورځنۍ توګه راستنېدونکو کډوالو او کونړ ولایت کې پر زلزله ځپلو هېوادوالو زرګونه خوراکه پاخه خواړه او د څښاک پاکو اوبو د وېش سربېره د روغتیا او لنډمهالې سرپناه جوړولو برخه کې خدمات وړاندې کوي. نوموړي د یادو فعالیتونو د لا پراختیا په موخه د نړیوالو مرستندویه بنسټونو ملاتړ مهم وباله او د مرستو د زیاتوالي غوښتنه یې وکړه.
اغلې فریزر د افغاني سرې میاشتې له لوري هېوادوالو ته پر وړاندې کېدونکو خدمتونو خوښي وښوده، د اړمنو، پېښځپلو او راستنېدونکو کډوالو د لاسنیوي برخه کې یې د همکاریو د پراختیا ژمنه وکړه.
