د غوره روغتیایي خدمتونو وړاندې کولو په اړه روزنیز ورکشاپ پیل شو
سې شنبه، ۱ ربیعالثاني ۱۴۴۷
د افغاني سرې میاشتې د روغتیا ریاست اړوند د کابل، هرات او بادغیس ولایتونو یو شمېر کارکوونکو ته د فنلنډ د سره صلیب په مالي ملاتړ هېوادوالو ته د لا غوره او اغېزمنو روغتیايي خدمتونو وړاندې کولو په موخه دوه ورځنی روزنیز ورکشاپ پیل شو.
یاد ورکشاپ چې د افغاني سرې میاشتې د سکرتر جنرال عملیاتي مرستیال ښاغلي مولوي روح الله عبدالسلام او په افغانستان کې د ملي ټولنو نړیوال فدراسیون د پروګرامونو د مسئول ښاغلي احمد سلیمان په حضور کې پیل شو، د مسئولینو له لوري په کې د روغتیايي خدماتو پر اغېزمنتیا او چټکتیا ټینګار وشو او د ورکشاپ له ګډونوالو وغوښتل شول، څو له دې فرصت څخه پوره ګټه واخلي او په خپلو ورځنیو دندو کې نوښت راولي.
د یادونې وړ ده، چې دغه دوه ورځني ورکشاپ کې به د روغتیا برخې کارکوونکو ته د غوره خدمتونو وړاندې کولو په پار د اغېزمن پلان جوړونې، د روغتیايي چوپړتیاوو اړوند پروژو د ډيزاین او په تېر کې د رامنځته شوو نیمګړتیاوو له بیا تکرار څخه د مخنيوي برخه کې لازمه روزنه او پوهاوی ورکړل شي.
