عمومي رئیس د یوناما له مشرې سره د بشري مرستو د پیاوړتیا په موخه وکتل
یکشنبه، ۷ ربیع الأول ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور د افغانستان لپاره د ملګرو ملتونو د سیاسي استازولۍ (یوناما) له مشرې اغلې روزا اوتونبایېوا او د نوموړې له مرستیالې جورجیت ګانیون سره د بشري مرستو د پراختیا، همغږۍ او فعالیتونو د پیاوړتیا په موخه وکتل.
کتنه کې ښاغلي دلاور د افغاني سرې میاشتې له لوري د هېواد په کچه د ثابتو روغتیایي کلینیکونو، ګرځنده روغتیایي ټیمونو، رواني مرکزونو او مرستونونو له لارې، رواني ناروغانو، راستنېدونکو کډوالو، د سوري زړه ماشومانو، بې سرپرسته او اړمنو وګړو ته د وړاندې کېدونکو خدمتونو سربېره د طبیعي او غیر طبیعي پېښو پر مهال د اغېزمنېدونکو هېوادوالو د لاسنیوي په اړه معلومات شریک کړل.
دغه راز نوموړي زیاته کړه، چې افغاني سرې میاشتې د د راستنېدونکو کډوالو په څلورو پنډغالو ( ابرېشم پل، اسلامکلا، سپين بولدک او تورخم) کې د روغتیايي خدمتونو ترڅنګ هره ورځ پر لس زره (۱۰۰۰۰) کډوالو پاخه خواړه او د څښاک پاکې اوبه وېشل کېدې، چې په دې وروستیو کې د کډوالو په شمېر کې د زياتوالي له امله د پخو خوړو او څښاک پاکو اوبو اندازه شل زره (۲۰۰۰۰) خوراکو ته لوړه شوې ده.
ښاغلي دلاور د یوناما له مشرې وغوښتل چې د یادو فعالیتونو د پراخوالي په موخه له افغاني سرې میاشتې سره خپلې مرستې زیاتې کړي.
د یوناما مشرې د بې وزلو د لاسنيوي برخه کې د افغاني سرې میاشتې بشرپال خدمتونه مٶثر او د غورځنګ د اووه ګونو بنسټيزو اصولو سره سم وبلل او له دې ملي ټولنې سره يې د همکاريو د دوام ژمنه وکړه.
